En Redelibros, Entrada ao xardín do saber

Xa van alá unha porrada de anos desde a nosa primeira novela. Estreabámonos en 1993 con Mar para todo o sempre, premio Carvalho Calero. Seguiríanlle a esta Os desherdados, en 2006, e O prezo da tentación, en 2008. Nunha certa medida, e tanto pola pouca dimensión e expansión do citado premio, así como o feito de logo ter publicado en Edicións Embora os posteriores títulos, a Ponte das Pías, máis que enlazar coa outra banda da ría, parece que nos ten impedido a conexión con ela e, consecuentemente, co resto de Galiza. Ben sabían disto os traballadores da vella ASTANO. Cortaren ao pé da ponte e na vía do tren e conseguiren o illamento da nosa "amadodiada" cidade, de Ferrol. Tal semella, nun certo sentido, o que a nós nos leva pasado desde hai moito tempo.

A nosa cuarta aposta narrativa longa muda, pois, de rumbo. A empresa arríscase agora a unha distribución do produto ben distinta. Nace con renovados folgos e ánimo de achar mellor acomodo e diversidade, cando menos xeográfica, entre os lectores. A Feira do libro, primeiro de Ourense e, posteriormente, a de Ferrol, supuxeron a primeira e difícil proba. A estas alturas, o balance de ambas témolo que xulgar bastante positivo, canto ao número de vendas polo menos. As presentacións de Entrada ao xardín do saber en Ferrol, Vigo e Narón déixannos boas sensacións e créannos expectativas. Desde aquí queremos aproveitar para agradecer dunha maneira especial a importante achega feita polos nosos actuais valedores. A Jose Fandiño e Nicolás Vidal, polas presentacións de Ferrol e Narón. A Ramón Nicolás, pola realizada na Libraría Cartabón de Vigo,





así como pola recensión en  http://cadernodacritica.blogaliza.org/tag/fugas/. A Vicente Araguas, pola óptima acollida en  http://www.diariodeferrol.com/media/diariodeferrol/files/2014/06/30/nordesia.pdf. E a X. Lorenzo pola entrevista feita o 10 de xullo en Sermos Galiza. A todos eles, o maior e máis sentido dos nosos agradecementos. Só nos falta por desexar, finalmente, a Henrique de Sas, na súa expedición á procura de Risco e a estraña descuberta de Hildegart e Aurora Rodíguez Carballeira, a mellor das singraduras.  



En Redelibros, Entrada ao xardín do saber